ക്രിസ്തുവിന്‍റെ ദാനം എത്ര മധുരം

എന്‍റെ അടിസ്ഥാനം അതു ക്രിസ്തുവില്‍

പൂര്‍ണ്ണ സമാധാനം ഉണ്ടു അവനില്‍

                            1

പണ്ടു എന്‍റെ പാപം മനസ്സാക്ഷിയെ

കുത്തി, ഈ വിലാപം തീര്‍ന്നതെങ്ങനെ?

എന്‍ വിശ്വാസക്കണ്ണു നോക്കി ക്രൂശിന്മേല്‍

എല്ലാം തീര്‍ത്തു അന്നു എന്‍ ഇമ്മാനുവേല്‍ (എന്‍റെ അടിസ്ഥാനം..)

                            2

ക്രിസ്തുവിന്‍റെ കയ്യില്‍ മറഞ്ഞിരിക്കെ

പേയിന്‍ സൂത്രം എന്നില്‍ എല്ലാം വെറുതേ;

തീര്‍ത്ത ആയുധങ്ങള്‍ എല്ലാം നശിക്കും

ഇല്ല ചഞ്ചലങ്ങള്‍, ധൈര്യമോ തുലോം (എന്‍റെ അടിസ്ഥാനം..)

                            3

ഭയം സംശയങ്ങള്‍ തീരെ നീങ്ങുവാന്‍

എത്ര വാഗ്ദത്തങ്ങള്‍ തന്നിട്ടുണ്ടു താന്‍;

അതില്‍ ഒരു വള്ളി ഇല്ലാതാകുമോ?

പോകയില്ലോര്‍ പുള്ളി, അവിശ്വാസം പോം (എന്‍റെ അടിസ്ഥാനം..)

                            4

ബുദ്ധിമുട്ടു ഖേദം വളരെ വന്നാല്‍

എനിക്കെന്തു ചേതം? ഞാന്‍ കര്‍ത്താവിന്‍ ആള്‍;

അവന്‍ എന്‍റെ സ്വന്തം തന്‍റെ രാജ്യവും

എനിക്കുള്ള അംശം, ആരതെടുക്കും? (എന്‍റെ അടിസ്ഥാനം..)